ਤਿਉਹਾਰੀ ਸੀਜ਼ਨ 'ਚ ਰਸੋਈ ਦਾ ਬਜਟ ਵਿਗੜਿਆ: ਅਮੂਲ ਨੇ ਵਧਾਈਆਂ ਘਿਓ ਅਤੇ ਮੱਖਣ ਦੀਆਂ ਕੀਮਤਾਂ; ਸਪਲਾਈ ਦੀ ਘਾਟ ਨਾਲ ਗਾਹਕ ਪਰੇਸ਼ਾਨ

ਦੀਵਾਲੀ ਦੇ ਪਵਿੱਤਰ ਤਿਉਹਾਰ ਤੋਂ ਠੀਕ ਪਹਿਲਾਂ ਦੇਸ਼ ਦੇ ਆਮ ਨਾਗਰਿਕਾਂ 'ਤੇ ਮਹਿੰਗਾਈ ਦਾ ਇੱਕ ਹੋਰ ਵੱਡਾ ਬੋਝ ਪੈ ਗਿਆ ਹੈ। ਦੇਸ਼ ਦੀ ਸਭ ਤੋਂ ਵੱਡੀ ਡੇਅਰੀ ਸੰਸਥਾ 'ਗੁਜਰਾਤ ਸਹਿਕਾਰੀ ਦੁੱਧ ਮਾਰਕੀਟਿੰਗ ਫੈਡਰੇਸ਼ਨ' (GCMMF) ਨੇ ਆਪਣੇ ਪ੍ਰਮੁੱਖ ਬ੍ਰਾਂਡ ਅਮੂਲ ਦੇ ਘਿਓ ਅਤੇ ਮੱਖਣ ਦੀਆਂ ਦਰਾਂ ਵਿੱਚ ਵਾਧਾ ਕਰ ਦਿੱਤਾ ਹੈ। ਨਵੀਆਂ ਵਧੀਆਂ ਹੋਈਆਂ ਕੀਮਤਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਲਾਗੂ ਵੀ ਕਰ ਦਿੱਤਾ ਗਿਆ ਹੈ, ਜਿਸ ਨਾਲ ਤਿਉਹਾਰਾਂ ਦੌਰਾਨ ਹਰੇਕ ਘਰ ਵਿੱਚ ਮਠਿਆਈਆਂ ਅਤੇ ਖਾਣ-ਪੀਣ ਦੀਆਂ ਚੀਜ਼ਾਂ ਤਿਆਰ ਕਰਨ ਦਾ ਬਜਟ ਕਾਫ਼ੀ ਵਧਣ ਦੇ ਆਸਾਰ ਹਨ।

ਤਾਜ਼ਾ ਵਾਧੇ ਤੋਂ ਬਾਅਦ ਹੁਣ ਅਮੂਲ ਘਿਓ ਦੇ 1 ਕਿਲੋਗ੍ਰਾਮ ਦੇ ਡੱਬੇ ਦੀ ਕੀਮਤ ₹630 ਤੋਂ ਵਧ ਕੇ ₹680 ਹੋ ਗਈ ਹੈ, ਜਿਸ ਵਿੱਚ ਸਿੱਧਾ ₹50 ਦਾ ਵਾਧਾ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ 500 ਗ੍ਰਾਮ ਸ਼ੁੱਧ ਘਿਓ ਦੇ ਪੈਕੇਟ ਦੀ ਕੀਮਤ ਵੀ ₹325 ਤੋਂ ਵਧਾ ਕੇ ₹345 ਕਰ ਦਿੱਤੀ ਗਈ ਹੈ। ਮੱਖਣ ਦੇ ਸ਼ੌਕੀਨਾਂ ਨੂੰ ਵੀ ਹੁਣ ਵੱਧ ਜੇਬ ਢਿੱਲੀ ਕਰਨੀ ਪਵੇਗੀ, ਕਿਉਂਕਿ 100 ਗ੍ਰਾਮ ਮੱਖਣ ਦਾ ਪੈਕੇਟ ਹੁਣ ₹63 ਦੀ ਥਾਂ ₹66 ਵਿੱਚ ਮਿਲੇਗਾ, ਜਦੋਂ ਕਿ 500 ਗ੍ਰਾਮ ਮੱਖਣ ਦੇ ਪੈਕੇਟ 'ਚ ₹15 ਦਾ ਵਾਧਾ ਹੋਣ ਨਾਲ ਇਸ ਦੀ ਨਵੀਂ ਕੀਮਤ ₹325 ਹੋ ਗਈ ਹੈ। ਇਸ ਤੋਂ ਇਲਾਵਾ ਅਮੂਲ ਦੇ ਔਨਲਾਈਨ ਪਲੇਟਫਾਰਮ 'ਤੇ ਗਾਂ ਦਾ ਘਿਓ ₹740 ਪ੍ਰਤੀ ਲੀਟਰ, ਮੱਝ ਦਾ ਘਿਓ ₹720 ਪ੍ਰਤੀ ਲੀਟਰ ਅਤੇ ਸਾਗਰ ਘਿਓ ₹710 ਪ੍ਰਤੀ ਲੀਟਰ ਵਿਕ ਰਿਹਾ ਹੈ, ਜਦੋਂ ਕਿ ਕਈ ਹੋਰ ਪ੍ਰਮੁੱਖ ਵਰਾਇਟੀਆਂ ਔਨਲਾਈਨ ਵੀ ਉਪਲਬਧ ਨਹੀਂ ਦਿਖਾਈ ਦੇ ਰਹੀਆਂ।

ਕੀਮਤਾਂ ਵਿੱਚ ਹੋਏ ਇਸ ਵਾਧੇ ਦੇ ਨਾਲ-ਨਾਲ ਬਾਜ਼ਾਰ ਵਿੱਚ ਸਪਲਾਈ ਦੀ ਗੰਭੀਰ ਸਮੱਸਿਆ ਵੀ ਪੈਦਾ ਹੋ ਗਈ ਹੈ। ਗਣੇਸ਼ ਉਤਸਵ ਤੋਂ ਬਾਅਦ ਹੀ ਵਡੋਦਰਾ, ਅਹਿਮਦਾਬਾਦ, ਪੁਣੇ, ਕੋਲਕਾਤਾ ਅਤੇ ਜੰਮੂ-ਕਸ਼ਮੀਰ ਵਰਗੇ ਸ਼ਹਿਰਾਂ ਵਿੱਚ ਅਮੂਲ ਘਿਓ ਦਾ ਸਟਾਕ ਕਾਫ਼ੀ ਘਟ ਗਿਆ ਹੈ। ਵਡੋਦਰਾ ਦੇ ਖਚੋਲਚੇ ਪ੍ਰਚੂਨ ਵਿਕਰੇਤਾਵਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਆਪਣੀ ਲੋੜ ਅਨੁਸਾਰ ਬਹੁਤ ਹੀ ਘੱਟ ਸਟਾਕ ਮਿਲ ਰਿਹਾ ਹੈ, ਜਿਸ ਨਾਲ ਗਾਹਕਾਂ ਨੂੰ ਖਾਲੀ ਹੱਥ ਮੁੜਨਾ ਪੈ ਰਿਹਾ ਹੈ।

ਇਸ ਸਪਲਾਈ ਸੰਕਟ ਅਤੇ ਮੰਗ ਵਧਣ ਦਾ ਮੁੱਖ ਕਾਰਨ ਨਕਲੀ ਘਿਓ ਵਿਰੁੱਧ ਸਰਕਾਰੀ ਕਾਰਵਾਈ ਨੂੰ ਮੰਨਿਆ ਜਾ ਰਿਹਾ ਹੈ। ਗੁਜਰਾਤ ਅਤੇ ਰਾਜਸਥਾਨ ਵਿੱਚ ਪਿਛਲੇ ਛੇ ਮਹੀਨਿਆਂ ਦੌਰਾਨ ਲਗਭਗ 2 ਲੱਖ ਕਿਲੋਗ੍ਰਾਮ ਮਿਲਾਵਟੀ ਘਿਓ ਜ਼ਬਤ ਕੀਤਾ ਗਿਆ ਹੈ, ਜਿਸ ਕਾਰਨ ਆਮ ਲੋਕ ਹੁਣ ਅਮੂਲ ਵਰਗੇ ਭਰੋਸੇਮੰਦ ਬ੍ਰਾਂਡਾਂ ਵੱਲ ਵਧੇਰੇ ਰੁਖ਼ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਦੇਸ਼ ਵਿੱਚ ਸਾਲਾਨਾ ਘਿਓ ਦੀ ਕੁੱਲ ਖਪਤ ਦਾ ਲਗਭਗ 45 ਫ਼ੀਸਦੀ ਹਿੱਸਾ ਇਕੱਲੇ ਤਿਉਹਾਰੀ ਸੀਜ਼ਨ ਦੌਰਾਨ ਹੀ ਹੁੰਦਾ ਹੈ, ਜਿਸ ਨਾਲ ਮੰਗ ਵਿੱਚ ਅਚਾਨਕ ਬਹੁਤ ਉਛਾਲ ਆਇਆ ਹੈ।

ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਸਤੰਬਰ ਵਿੱਚ ਜਦੋਂ ਸਰਕਾਰ ਨੇ ਡੇਅਰੀ ਉਤਪਾਦਾਂ 'ਤੇ ਜੀਐਸਟੀ (GST) ਦੀ ਦਰ 12% ਤੋਂ ਘਟਾ ਕੇ 5% ਕੀਤੀ ਸੀ, ਤਾਂ ਅਮੂਲ ਨੇ 700 ਤੋਂ ਵੱਧ ਉਤਪਾਦਾਂ ਦੇ ਦਾਮ ਘਟਾ ਕੇ ਆਮ ਜਨਤਾ ਨੂੰ ਵੱਡੀ ਰਾਹਤ ਦਿੱਤੀ ਸੀ। ਉਸ ਸਮੇਂ ਇੱਕ ਲੀਟਰ ਘਿਓ ₹650 ਤੋਂ ਘਟ ਕੇ ₹610 ਅਤੇ 100 ਗ੍ਰਾਮ ਮੱਖਣ ₹62 ਤੋਂ ਘਟ ਕੇ ₹58 ਹੋ ਗਿਆ ਸੀ। ਹਾਲਾਂਕਿ, ਹੁਣ ਕੀਤੇ ਗਏ ਤਾਜ਼ਾ ਵਾਧੇ ਨੇ ਉਸ ਟੈਕਸ ਕਟੌਤੀ ਤੋਂ ਮਿਲੇ ਫਾਇਦੇ ਨੂੰ ਲਗਭਗ ਖ਼ਤਮ ਕਰ ਦਿੱਤਾ ਹੈ। ਇਸ ਪੂਰੇ ਮਾਮਲੇ 'ਤੇ GCMMF ਵੱਲੋਂ ਅਜੇ ਤੱਕ ਕੋਈ ਅਧਿਕਾਰਤ ਸਪੱਸ਼ਟੀਕਰਨ ਜਾਰੀ ਨਹੀਂ ਕੀਤਾ ਗਿਆ ਹੈ।